Agjencia Ndërkombëtare e Energjisë Bërthamore (ANEB) njofton se Rusia ka dërguar specialistë bërthamorë për të ndihmuar në monitorimin e centralit bërthamor të Zaporizhjas, që gjendet në juglindje të Ukrainës. Ky central bërthamor, që është nën kontrollin rus por ende operohet nga stafi ukrainas pas luftimeve të ashpra midis forcave ruse dhe ukrainase, ka qenë një burim i shqetësimesh për eskpertët e sigurisë së centraleve bërthamorre. Shefi i agjencisë, Rafael Mariano Grossi, tha se stafi ukrainas që gjendet në central është duke punuar “nën një presion jashtëzakonisht të madh”. Agjencia njofton se tetë përfaqësues të agjencisë bërthamore ruse, Rosenergoatom janë dërguar në centralin e Zaporizhjas. Kievi akuzon Rusinsë se ka sulmuar qëllimisht gjashtë reaktorët e centralit, duke shkaktuar zjarr dhe duke rritur frikën se veprimet ndaj këtij centrali mund të çojnë në një katastrofë botërore, ashtu siç kishte ndodhur me Çernobilin. Pak kohë pasi Moska nisi pushtimin e Ukrainës më 24 shkurt, forcat ruse morën nën kontroll centralin e Çernobilit, që gjendet në veri të Kievit. Në këtë central ka pasur luftime dhe ka pasur raportime se forcat ruse kanë shkelur në tokën e kontaminuar dhe mund të jenë ekspozuar ndaj rrezatimit. Ukraina ka katër centrale bërthamore, të cilat së bashku kanë 15 reaktorë që janë në operim.