Një sulm rus me dron gjatë natës ka shkaktuar dëme mbi mburojën e rrezatimit të centralit bërthamor të Çernobilit, tha të premten presidenti i Ukrainës, Volodymyr Zelensky. Çernobili është vendi i katastrofës më të madhe bërthamore në botë, kur një nga katër reaktorët e tij shpërtheu në vitin 1986. Ky reaktor është i mbështjellë nga një strehë, e njohur si sarkofag, për mbrojtje nga rrezatimi i mbetur. Droni rus goditi mburojën e njësisë së shkatërruar në këtë central bërthamor, duke shkaktuar një zjarr, i cili u shua, tha Zelensky. “Tani për tani, niveli i rrezatimit nuk është rritur dhe po vëzhgohet vazhdimisht”, theksoi ai, duke shtuar se vlerësimet fillestare tregojnë për dëme të mëdha. “Vendi i vetëm në botë që sulmon një zonë të tillë, uzurpon centralet bërthamore, dhe kryen luftë pa keqardhje për pasojat, është Rusia e sotme”, nënvizoi ai. Agjencia Ndërkombëtare për Energji Bërthamore tha se personeli i saj në vendngjarje reagoi brenda disa minutash pas sulmit, duke shtuar se nuk ka viktima. “Nivelet e rrezatimit brenda dhe jashtë mbeten normale dhe të qëndrueshme”, tha ajo në X. Sulmi ndodhi dy ditë pasi presidenti i Shteteve të Bashkuara, Donald Trump, tha se do të takohej me presidentin e Rusisë, Vladimir Putin, për të biseduar për përfundimin e luftës në Ukrainë. Por, Zelensky tha në Telegram se sulmi në Çernobil tregoi se “Putini, natyrisht, nuk po përgatitet për negociata”. “Rusia duhet të mbahet përgjegjëse për atë që po bën”, shtoi ai.