Sulmet ruse plagosën gjashtë persona në Odesa, përfshirë tre fëmijë, tha të mërkurën administrata ushtarake e qytetit ukrainas. "Dronët sulmuan ndërtesat e banimit, infrastrukturën logjistike dhe energjetike të rajonit tonë", tha në Telegram kreu rajonal i administratës ushtarake të Odesës, Oleg Kiper. Dy fëmijë të moshës tetë dhe 14 vjeç u plagosën në sulm, si dhe një foshnjë shtatë muajshe, tha Sergiy Lysak, kreu i administratës ushtarake të qytetit, në një postim të veçantë në Telegram. Një burrë 42-vjeçar u plagos gjithashtu dhe është në "gjendje të rëndë", shtoi ai. Në përditësimin e tij të fundit herët të mërkurën, ai e çoi numrin e përgjithshëm të viktimave në gjashtë. Pjesë të Odesës humbën furnizimin me ngrohje dhe ujë. Përtej Odesës, dronët rusë plagosën dy burra në rajonin e Dnipropetrovskut, tha në Telegram kreu i administratës ushtarake Vladyslav Gaivanenko. Ndërkohë, në Rusi, dy persona u plagosën në një sulm me dron në Tuapse në rajonin e Krasnodar Krai, tha kreu i bashkisë Sergei Boiko në një postim në Telegram. Sulmi dëmtoi një pjesë të portit dhe pajisje në një rafineri nafte, si dhe shtëpi. Sulmet e ukrainës po ashtu lanë tre persona të plagosur në rajonin e Belgorodit, tha guvernatori i tij Vyacheslav Gladkov në Telegram. Sulmet erdhën pasi Ukraina mohoi shënjestrimin me dronë të njërës nga rezidencat e Presidentit rus Vladimir Putin dhe akuzoi Moskën për përhapjen e gënjeshtrave për të manipuluar bisedimet për përfundimin e luftës. Kremlini tha të martën se e konsideronte sulmin e dyshuar me dron në rezidencën e izoluar të Putinit në rajonin e Novgorodit si një "akt terrorist" dhe një "sulm personal kundër Putinit".