Rusia ka intensifikuar sulmet e saj në rajonin jugor ukrainas të Odesës, duke shkaktuar ndërprerje të mëdha të energjisë dhe duke kërcënuar infrastrukturën detare të rajonit. Zëvendëskryeministri ukrainas Oleksiy Kuleba tha se Moska po kryen sulme "sistematike" mbi rajon. Javën e kaluar, ai paralajmëroi se fokusi i luftës "mund të jetë zhvendosur drejt Odesës". Presidenti Volodymyr Zelensky tha se sulmet e përsëritura ishin një përpjekje nga Moska për të bllokuar aksesin e Ukrainës në logjistikën detare. Më herët këtë muaj, Presidenti rus Vladimir Putin kërcënoi të ndërpresë aksesin e Ukrainës në det si hakmarrje për sulmet me dronë ndaj cisternave të "flotës hije" të Rusisë në Detin e Zi. "Flota në hije" është një term që i referohet qindra cisternave të përdorura nga Rusia për të anashkaluar sanksionet perëndimore të vendosura pas pushtimit të Ukrainës në vitin 2022.