Zëvendësministri i jashtëm rus, Sergey Ryabkov, tha se nuk përjashton mundësinë që moska të dislokojë sisteme raketore bërthamore si kundërpërgjigje ndaj vendosjes së mundshme në të ardhmen, të raketave amerikane me rreze të gjatë veprimi, në Gjermani. Vendimi për vendosjen e raketave me rreze të gjatë veprimi, të shteteve të bashkuara në Gjermani, nga viti 2026, sipas ministrit gjerman të mbrojtjes Boris Pistorius, është një përgjigje ndaj vendosjes së sistemeve raketore taktike Iskander në Rajonin e Kaliningradit të Rusisë. "Ajo që Shtetet e Bashkuara do të bëjnë në Gjermani nga viti 2026 nuk është gjë tjetër veçse një përgjigje ndaj kërcënimit të Rusisë të përfaqësuar nga vendosja e raketave Iskander në Kaliningrad," tha ai në një intervistë për gazetën Tageblatt, të Luksemburgut. Pistorius tha se Gjermania "nuk është përballur me problemin e vendosjes së armëve për 35 vjet". Sipas tij, prania e raketave amerikane në Gjermani mund të shpjegohet me nevojën për parandalim bërthamor. “Kur të gjithë të kuptojnë se Gjermania dhe NATO janë në gjendje të mbrojnë veten me sukses, kjo do të zvogëlojë mundësinë e një sulmi ndaj nesh”, shtoi ai. Zyra e shtypit e Shtëpisë së Bardhë të SHBA-së njoftoi më 10 korrik se Shtetet e Bashkuara do të fillonin vendosjen e raketave me rreze të gjatë veprimi në Gjermani në vitin 2026. Ambasadori rus në Uashington, Anatoly Antonov tha se planet e SHBA-së rrisin gjasat për një garë raketore dhe mund të çojnë në një përshkallëzim të pakontrolluar.