Anijet luftarake ruse dhe kineze filluan të martën stërvitjet e përbashkëta që moska i ka cilësuar si më të mëdhatë e kohëve të fundit e që shtrihen nga Mesdheu në Paqësor. Ministria e Mbrojtjes së Rusisë tha se katër anije luftarake kineze dhe një anije furnizimi u bashkuan me anijet ruse në Gjirin e Pjetrit të Madh, në jug të Vladivostokut, për stërvitje të përbashkëta që kanë si qëllim të mbrojnë komunikimet detare dhe zonat e aktivitetit ekonomik detar. Ministria tha se ato stërvitje ishin pjesë e manovrave shumë më të mëdha që përfshijnë më shumë se 400 anije luftarake, nëndetëse dhe anije mbështetëse ruse që do të zhvillohen deri më 16 shtator në Oqeanin Paqësor dhe Arktik dhe në detet Mesdhe, Baltik dhe Kaspik. Agjencia zyrtare e lajmeve në Kinë, Xinhua, tha një ditë më parë se qëllimi i stërvitjeve me Rusinë ishte që të thellohej "niveli i koordinimit strategjik midis ushtrive kineze dhe ruse dhe të rritej aftësia e tyre për t'iu përgjigjur së bashku kërcënimeve të sigurisë". Forcat e armatosura të Rusisë janë shtrirë shumë në tokë dhe det gjatë më shumë se dy vityeve të fundit për shkak të luftës së saj në Ukrainë. Por megjithatë, Rusia ka vazhduar të kryejë stërvitje ushtarake në shkallë të gjerë, duke përfshirë edhe ato në lindjen e saj të largët, në mënyrë që të projektojë fuqinë e saj dhe të ndërtojë lidhje mbrojtëse me partnerët, veçanërisht Kinën.