Gjashtë persona u vranë kur një burrë me origjinë ruse hapi zjarr ndaj kalimtarëve në një lagje të Kievit përpara se të hynte në një supermarket ku mori peng klientët dhe ku më pas u qëllua për vdekje nga policia, thanë autoritetet. Shërbimi i Sigurisë i Ukrainës tha se rasti po hetohet si një akt terrorist, por nuk dha asnjë motiv. Presidenti Volodymyr Zelenski, duke folur në fjalimin e tij të përnatshëm, tha se të shtënat ndodhën në lagjen e gjelbër Holosiivskyi, ku edhe u plagosën 14 persona. "Ai mori pengje dhe për fat të keq, një prej tyre u vra," tha Zelenski. "Katër persona vdiqën pasi u qëlluan në rrugë. Një grua vdiq në spital pasi u plagos rëndë", shtoi ai. Një nga të plagosurit ishte një djalë 12-vjeçar, prindërit e të cilit u vranë, tha Prokurori i Përgjithshëm Ruslan Kravchenko. Pamjet video treguan ekipet e emergjencave duke ngarkuar trupat në ambulanca. Të shtënat e kësaj natyre janë jashtëzakonisht të rralla në Ukrainë, qytetet e së cilës përballen me sulme ajrore të rregullta ruse. "U shokova kur pashë fotot e njerëzve që ishin vrarë", tha Lesia Rybzha, 45 vjeç. "Ende nuk mund ta kuptoj pse, përveçse rusët na po na vrasin me sulme ajrore, po vrasin tani edhe njerëz në rrugë."