SPAK ka përfunduar hetimet ndaj një shtetasi rus, i akuzuar për kërcënim me bombë në aeroportin e Rinasit. Bëhet fjalë për Vladislav Urban, 44 vjeç, i cili është marrë i pandehur për “kanosje për kryerjen e veprave me qëllime terroriste”. Sipas hetimeve, në shkurt të vitit 2023 ai ka dërguar një email në adresë të drejtuesve të aeroportit, ku kërcënonte me shpërthim bombe, duke vendosur kushte politike që qeveria Shqiptare të njihte Kosovën si Serbi. Në mesazh ai pretendonte gjithashtu se kishte marrë peng dy shtetas shqiptarë. Nga verifikimet e kryera në bashkëpunim me autoritetet greke, rezultoi se 44-vjeçari jetonte në Selanik dhe se pretendimet për pengmarrje nuk ishin të vërteta. Po ashtu, ai rezulton me precedentë për dërgim mesazhesh kërcënuese. Çështja tashmë i ka kaluar gjykatës për vijimin e procedurave.