Një eskortë e rreme rumune ka pranuar vrasjen e dy biznesmenëve dhe helmimin e dy të tjerëve me qëllim për t'i vjedhur përmes ofrimit të marrëdhënieve seksuale. Adina Mihai u paraqit si punonjëse seksi për të hyrë në shtëpinë 4 milionë paundëshe në Cotsëolds të një manjati të pasur të pronave, i cili njihej si një nga gjuetarët më të mëdhenj të kafshëve të egra në botë. Malcolm King, 83 vjeç, vdiq pasi iu dha një dozë fatale helmi vetëm pak kohë pasi e ftoi 31-vjeçaren në rezidencën e tij luksoze me gjashtë dhoma gjumi. Nën akuzë, sipas Daily Mail është vendosur dhe i dashuri i saj 30-vjeçari Madalin Dumitru, të cilët pranuan fajësinë para gjykatës. Sipas hetimeve, nga gushti i vitit 2024 deri në korrik 2025, dy të akuzuarit, të cilët më parë jetonin në Ilford të Essexit, kishin në shënjestër burra që kërkonin shërbime seksuale. Fillimisht ata merrnin parapagime nga viktimat dhe më pas Mihai i vizitonte në banesat e tyre. Ajo u jepte fshehurazi substancën GBL, një lëndë me efekt të fortë qetësues dhe narkotik. Hetuesit identifikuan gjithashtu dy burra të tjerë në jug të Anglisë, të cilët ishin droguar dhe grabitur nga të akuzuarit, por kishin arritur të mbijetonin. Për arsye ligjore, identiteti i tyre nuk është bërë publik. Deri tani, autoritetet nuk kanë lidhur me çiftin raste të tjera vdekjesh, helmimesh apo grabitjesh, megjithatë policia nuk përjashton mundësinë që të ketë edhe viktima të tjera.