Forcat e NATO-s ngritën në ajër katër avionë luftarakë gjatë natës, pasi Rusia kreu sulme me dronë me rreze të gjatë veprimi pranë kufirit të Ukrainës me Rumaninë. Rumania po heton madje nëse një dron rus hyri në një thellësi deri në 500 metra në hapësirën ajrore të NATO-s "për një periudhë shumë të shkurtër kohore", tha të martën Ministria e Mbrojtjes e Bukureshtit. Qeveria rumune tha se ushtria e saj kishte aktivizuar një alarm ajror në rajonin juglindor të Tulceas, pasi Moska nisi një "seri sulmesh me dronë ndaj objektivave civilë dhe infrastrukturës portuale" në Ukrainën perëndimore. Dy avionë luftarakë rumunë F-16 u ngritën nga një bazë ajrore në jugperëndim të Tulceas, dhe dy avionë italianë Eurofighter Typhoon u ngritën po ashtu nga baza ajrore Mihail Kogălniceanu, tha Bukureshti. Autoritetet rumune thanë se radarët kishin treguar se "trajektorja e njërit prej droneve të përfshirë në sulm mund të ketë kaluar, për një periudhë shumë të shkurtër kohore, hapësirën ajrore kombëtare". Oleh Kiper, kreu i rajonit jugor të Odesës në Ukrainë, paralajmëroi banorët vendas të martën herët se një alarm ajror ishte aktivizuar pasi qyteti portual i Izmailit ishte nën "kërcënimin e sulmeve me dronë". Forca ajrore e Ukrainës tha se dronë kamikazë Shahed të projektuar nga Irani ishin nisur drejt rajonit të Odesës. Tulcea ndodhet direkt përballë kufirit me ukrainën, në anën tjetër të portit ukrainas të Izmailit, të cilin Rusia e ka sulmuar vazhdimisht. Lumi Danub shënon kufirin mes dy vendeve, pak në veri të Tulceas.