Në kuadrin e ditëve të fushatës kundër dhunës ndaj grave, Kryetari i Kuvendit, Gramoz Ruçi, u është drejtuar me një letër krerëve të Drejtësisë dhe Policisë për zbatimin e legjislacionit kundër dhunës ndaj grave e vajzave. Letra u është drejtuar Naureda Llagamit, kryetare e Këshillit të Lartë Gjyqësor, Gent Ibrahimit, Kryetar i Këshillit të Lartë të Prokurorisë, Olsian Çelës, Prokuror i Përgjithshëm dhe Ardi Veliu, drejtor i Përgjithshëm i Policisë së Shtetit. “Kuvendi i Shqipërisë, në dhjetor të vitit 2017, ka miratuar Rezolutën “Për dënimin e dhunës ndaj grave dhe vajzave dhe rritjen e efektshmërisë së mekanizmave ligjore për parandalimin e tij”, shkruhet ne leter. Kuvendi i Shqipërisë, vijohet me tej, vëren se sistemi i drejtësisë nuk ka qenë efektiv sa duhet lidhur me hetimin dhe shqyrtimin e rasteve të dhunës në familje dhe të zbatimit të drejtë të dispozitave ligjore të Kodit Penal për dënimin e dhunuesve dhe ofrimin e shërbimeve për viktimat. Në këto kushte, kërkoj nga ana juaj të merrni masat e nevojshme për zbatimin rigoroz të dispozitave të Kodit Penal mbi dhunën në familje dhe dhunën ndaj grave”, shkruan në letrën e tij Kryetari i Kuvendit, Gramoz Ruçi.