Agjencia e lajmeve Reuters ka thënë se një nga gazetarët e saj që mbulon luftën në Ukrainë është zhdukur pas një sulmi rus në një hotel në lindje të vendit. Në një deklaratë, Reuters tha se ekipi i tij prej gjashtë personash po qëndronte në hotel në Kramatorsk - një qytet nën kontrollin e Ukrainës, por jo shumë larg vijës së frontit lindor kur godina u godit me raketa. Agjencia tha se dy anëtarë të ekipit ishin dërguar në spital, ndërsa tre të tjerë nuk kanë pësuar dëmtime. Autoritetet ukrainase thanë se ishte një raketë ruse, por Rusia ende nuk ka komentuar mbi sulmin. Agjencia e lajmeve publikoi pamjet që tregojnë pjesë të hotelit të shkatërruara plotësisht nga sulmi, me zjarrfikësit duke punuar mes rrënojave. Kramatorsk është vetëm rreth 20 kilometra nga pjesët e pushtuara nga Rusia dhe ka qenë vazhdimisht në shënjestrën e bombardimeve ruse.