Presidenti amerikan Donald Trump tha se "struktura ekzistuese" e Krahut Lindor të Shtëpisë së Bardhë duhet të shembet në mënyrë që të ndërtohet një sallë e re balloje prej 250 milionë dollarësh. Ekipet filluan prishjen e pjesëve të strukturës të hënën, dhe dy zyrtarë të administratës thanë se ajo do të shembet plotësisht deri në fundjavë. Kjo shënon një zgjerim të rëndësishëm të projektit të ndërtimit të njoftuar gjatë verës. Trump më herët kishte thënë se shtimi i sallës së ballove nuk do të "ndërhynte në ndërtesën aktuale". Ai hodhi poshtë akuzat se nuk kishte qenë transparent mbi shkallën e punimeve, duke u thënë gazetarëve: "Mendoj se kemi qenë më transparentë se kushdo tjetër". Por kritikat nga ambientalistët dhe politikanët e opozitës janë intensifikuar ndërsa shkalla e punimeve po vihet në qendër të vëmendjes. Shumë kanë sugjeruar se projekti duhet të ishte diskutuar më gjerësisht. Shtëpia e Bardhë konsiderohet një ndërtesë e veçantë që është e përjashtuar nga Akti Kombëtar i Ruajtjes Historike të vitit 1966, i cili zakonisht do të kërkonte shqyrtime publike të projekteve që prekin ndërtesat historike.