Shpejtësia, parakalimet e gabuara dhe drejtimi i mjetit në gjendje të dehur, vijojnë të jenë 3 nga faktorët që po cojnë cdo ditë e më shumë në rritjen e numrit të aksidenteve në mbarë vendin. Pas aksidenti fatal në rrugën e Kombit, ku si pasojë e shpejtësisë humbën jetën dy të rinj, njëri 19 vjec dhe tjetri 25, policia ka shtuar kontrollet pikërisht në këtë aks. Vetëm në harkun kohor të 24 orëve të fundit, rrugorët pezulluan 78 leje drejtimi, pasi drejtuesit e mjeteve u konstatuan duke qarkulluar me shpejtësi marramendëse që varionte nga 142 km/h deri në 218 km/h, në një kohë kur fluksi i automjeteve në këtë rrugë ishte shumë i lartë. Kontrolle ka patur edhe në aksin rrugor Milot Rubik, i cilësuar si një aks me rrezikshmëri të lartë. Në këtë segment, policia pezulloi 17 leje drejtimi për shkelje të ndryshme që përbëjnë rrezik në qakullimin rrugor.