Mundi dhe djersa e jetës e dy vëllezërve në Delvinë është shkrumbur në një fraksion sekondi, që fatmirësisht nuk u shoqërua në tragjedi për ta. Goditja nga rrufeja shfarosi tufën me të paktën 150 dele në fshatin Kopaçez të Delvinës. Ngjarja e rëndë ka ndodhur paraditen e së enjtes, ku bagëtitë e dy vëllezërve Arjanti dhe Klement Xhelili ishin grumbulluar poshtë një peme për t’u mbrojtur nga shiu i dendur i shoqëruar me rrufe. Pikërisht njëra prej tyre ka goditur mbi pemë dhe shkarkesa elektrike ka qenë aq e madhe sa ka lënë të ngordhur të gjithë tufën. Menjëherë ka shkuar në vend veterineri dhe grupi i punës i ngritur nga bashkia Delvinë që kanë nisur përllogaritjen e dëmit të shkaktuar. Fatmirësisht nga ngjarja kanë shpëtuar mrekullisht dy vëllezërit që ishin në distancë nga vendi ku goditi rrufeja.