Gjeneralmajori i ushtrisë italiane, Enrico Barduani, ka marrë zyrtarisht detyrën e shefit të misionit të NATO-s në Kosovë, KFOR. Këtë post e mbajti për një vit gjeneralmajor i ushtrisë turke, Ozkan Ulutash. Krerët më të lartë të shtetit kanë marrë pjesë në këtë ceremoni, përfshirë presidenten e Kosovës, Vjosa Osmani dhe kryeministrin, Albin Kurti. Barduani është përshkruar si njohës i mirë i rajonit të Ballkanit, teksa është ushtaraku i dytë i lartë italian që merr komandën, pas Angelo Ristucias. Osmani tha se populli dhe institucionet e Kosovës do të punojnë ngushtë me KFOR-in dhe partnerët ndërkombëtarë për të garantuar sigurinë për qytetarët e vet. Presidentja u ndal edhe tek sulmi i vitit të kaluar në Banjskë, në veri të Kosovës si edhe për sfidat e ndryshme të sigurisë, të cilat i ka përjetuar Kosova në 25 vjetët e fundit. KFOR-i aktualisht ka mbi 4.400 trupa ushtarake në Kosovë. NATO-ja e ka shtuar praninë e saj në Kosovë gjatë vitit 2023, pas rritjes së tensioneve në veriun e banuar me shumicë serbe.