Kryeministri Edi Rama iu rikthye replikave me përfaqësues të sistemit të drejtësisë. Përmes një postimi në rrjetet sociale, kreu i qeverisë shënjestroi argumentimin e dhënë nga një pjesë e magjistratëve se mjaftojnë të ardhurat e konfiskuara nga gjykatat e posaçme për të rritur rrogat. Historia e botës s’e ka parë që gjykatësit të thonë do t’i marrim paratë vetë nga thesari i shtetit se janë tonat dhe kjo “i kemi mbledhur vetë” është një hata më vete për nga shkalla rrëqethëse e paditurisë mbi funksionimin e shtetit. Le ta imagjinojmë sikur të çohen doganierët e tatimorët, policët e inspektorët dhe të thonë duam paratë që i kemi mbledhur vetë në thesarin e shtetit nga taksat e nga gjobat! Çfarë mbetet pastaj për mësuesit, mjekët, ushtarakët e plot e plot të tjerë që shërbejnë mijëra detyra të shtetit, për të cilat paguhen nga thesari?