Bashkimi Evropian ka vënë në shënjestër Facebook-un dhe Instagram-in. Komisioni Evropian ka ngritur një padi kundër Meta-s për shkelje të Aktit të Shërbimeve Dixhitale, pasi pretendon se dizajni i dy platformave të mediave sociale krijon varësi. Scrolli i pafundëm, hapja automatike e reel-save dhe videove, njoftimet push dhe sistemet e rekomandimit shumë të personalizuara janë karakteristika të sfiduara nga Komisioni Evropian sepse ato inkurajojnë "përdorimin kompulsiv të platformave, me rreziqe për mirëqenien fizike dhe mendore të përdoruesve". Rrjetet sociale, siç ekzistojnë aktualisht, krijojnë një varësi serioze të krahasueshme me atë të drogave të forta, veçanërisht për të miturit dhe personat vulnerabël. Komisioni Evropian ka nisur një hetim ndaj Meta-s në maj 2024 dhe mes përfundimeve të tij, ka disa elementë kritikë për gjigantin e teknologjisë. Brukseli beson se kompania duhet të ridizajnojë Instagramin dhe Facebook-un, për shembull duke çaktivizuar veçori si hapja automatike dhe scroll-i pa fund, duke përfshirë pauza për kohën e përdorimit dhe duke i bërë sistemet e rekomandimit më pak të fokusuara në maksimizimin e angazhimit të përdoruesit.