Pas skenave të kaosit në Capitol Hill, Twitter njoftoi se ka mbyllur për 12 orë llogarinë e presidentit në largim të Shtetetve të Bashkuara, Donald Trump, për shkak të disa postimeve të tij në lidhje me zgjedhjet. “Si rezultat i situatës dhe dhunës në Uashington, kemi kërkuar heqjen e tre postimeve nga llogaria e Donald Trump – të cilat janë bërë gjatë ditës së sotme – për shkak të shkeljeve të përsëritura dhe të rënda të politikës sonë të Integritetit Civil”, thanë drejtues të platformës sociale. Nëse Trump nuk i heq tre postimet, llogaria e tij do të mbetet e mbyllur. Twitter gjithashtu paralajmëroi se shkeljet e ardhshme të integritetit ose politikave të kërcënimit “do të rezultojnë me pezullim të përhershëm të llogarisë @realDonaldTrump”. Ndërkohë, Facebook ndaloi llogarinë e Trump-it për 24 orë. Facebook tha: “Ne e hoqëm atë pasi besojmë se ajo kontribuon, në vend që të zvogëlojë rrezikun e dhunës së vazhdueshme”. YouTube gjithashtu hoqi një video. Të mërkurën, mbështetës të dhunshëm të Trump-it sulmuan ndërtesën e Kongresit amerikan, e cila po mbante një seancë për konfirmimin e presidentit të zgjedhur, Joe Biden. Mesazhi i Trump-it për protestuesit, teksa mësynin Kongresin, u hoq nga Facebook, YouTube dhe Twitter. Presidenti u bënte thirrje mbështetësve të shkonin në shtëpi, ndërsa u përsëriti nga ana tjetër pretendimet e pabazuara për mashtrime në zgjedhje.