Një stuhi e fortë gjeomagnetike është në zhvillim, me efekte të mundshme në rrjetet e energjisë dhe sistemet e navigimit GPS (Xhi-pi-es). Stuhia, sipas klasifikimeve, është e nivelit mbi mesatar. Fenomeni, i raportuar nga Administrata Kombëtare Oqeanike dhe Atmosferike e SHBA-së, po prish fushën magnetike të Tokës dhe do të vazhdojë të paktën deri më 7 nëntor. Stuhia vjen për shkak të një serie shpërthimesh diellore dhe nxjerrjes së masës koronale. Një shpërthim diellor është një shpërthim i papritur dhe intensiv energjie nga dielli i shkaktuar nga çlirimi i papritur i energjisë magnetike në një rajon aktiv të njollave diellore. Këto shpërthime dërgojnë rrezatim dhe grimca të ngarkuara në hapësirë që mund të ndërpresin komunikimet në Tokë nëse shpërthimi vjen nga një njollë diellore përballë Tokës. Sipas ekspertëve, aurora spektakolare mund të ndodhin në gjerësi gjeografike të ulëta. "Që nga ora 9 e mëngjesit sipas orës sonë, të enjten, fusha magnetike e tokës është trazuar rëndë", shpjegojnë ekspertët. Sipas tyre, stuhitë diellore me intensitet më të ulët nisën që më 5 nëntor por akoma më shumë stuhi diellore janë në rrugë e sipër duke ruajtur atë më të madhen për në fund.