Top News – Rrjet ndërkombëtar për pastim parash/ 105 persona të arrestuar në operacionin e Europol

Një operacion ndërkombëtar i koordinuar nga Europol, i udhëhequr nga Policia Spanjolle dhe Shërbimi Sekret i SHBA, bëri të mundur shkatërrimin e një grupi të krimit të organizuar, të përfshirë në mashtrim dhe pastrim parash. Operacioni përfshiu gjithashtu shërbimet policore të Austrisë, Danimarkës dhe të Greqisë, të cilët më 6 tetor 2020 kryen mbi 40 bastisje shtëpish ku u arrestuan 37 të dyshuar dhe u sekuestruan 13 makina luksoze. Veprimet pasuese çuan në ngrirjen e 87 llogarive bankare me vlerë 1.3 milion €. Teksa operacioni vijoi, Europol, në faqen zyrtare tashmë bën të ditur se janë arrestuar 105 persona, të cilët akuzohen për mashtrime me kartat bankare dhe se janë sekuestruar 14 automjete luksoze e 406.000 euro cash. Ky grup i krimit të organizuar mësohet se u ka shkaktuar një dëm prej 12 milionë eurove 50 institucioneve financiare me bazë në SHBA.