Skandali i publikit të pagave për më shumë se 630 mijë shqiptarë, të cilëve përveç pagës u është publikuar edhe numri i kartës së identitetit dhe vendi i punës ka nxjerrë në pah edhe lidhjet e thella të politikanëve. Mes këtyre lidhjeve, zbulohet edhe ajo e Belind Këlliçit me Belinda Ballukun, ministren e Infrastrukturës. Vetë Belindi bën opozitarin kundër Qeverisë, ndërsa vëllai i tij, Reshard Këlliçi punon në këtë ministri me një pagë më shumë se tre herë më të lartë se paga mesatare në Shqipëri. Në dosjen e mbi 630 mijë pagave që janë tashmë në duart e shumë njerëzve, Reshard Këlliçi rezulton i punësuar si këshilltar ligjor pranë shoqërisë AlbGaz me pagë rreth 1.9 milion lek të vjetra. Shoqëria është themeluar në janar të vitit 2017-s për të ushtruar aktivitetin si Operator i Sistemit të transmetimit dhe shpërndarjes të gazit natyror dhe ajo është në pronësi 100 për qind të shtetit shqiptar me aksionet që zotërohen nga Ministria e Infrastrukturës e drejtuar nga Belinda Balluku. Kjo lidhje duket se ka qenë edhe arsyeja e “ndarjes” së votave mes Belinda Ballukut dhe Belind Këlliçit në zgjedhjet e 25 prillit. Ministrja dhe deputeti i PD-së dolën ndër kandidatët më të votuar nga qytetarët në këto zgjedhje. Mes zonave që mbulonte Këlliçi gjatë fushatës elektorale ishte dhe ajo e Kombinatit, ku kundërshtare kishte ministren e Infrastrukturës.