Ministri i Punëve të Brendshme, Besfort Lamallari, bëri të ditur se përmes Aktit Normativ të Buxhetit 2026, financimi për Policinë e Shtetit rritet me 701 milionë lekë, duke forcuar kështu mbështetjen për efektivët dhe investimet në modernizimin e institucionit. Lamallari, në një postim në rrjetet sociale, sqaroi se fondet shtesë do të shërbejnë për rritjen e pagave të policëve si dhe për investime në teknologji. “Përmes Aktit Normativ të Buxhetit 2026, rrisim me 701 milionë lekë financimin për Policinë e Shtetit. Më shumë mbështetje për pagat e efektivëve, më shumë investime në teknologji, më shumë motivim për strukturat elitare dhe një tjetër hap i vendosur drejt modernizimit sipas standardeve më të mira evropiane. Një polici më e fortë do të thotë një Shqipëri më e sigurt. Ky është angazhimi ynë dhe do ta çojmë përpara me vendosmëri”, shkroi ministri Lamallari. Ai sqaroi se rritja e financimit është pjesë e angazhimit të qeverisë për të garantuar një Polici të Shtetit më të aftë, më moderne dhe më të pajisur për t'u përballur me sfidat e sigurisë, në funksion të mbrojtjes së jetës, pronës dhe rendit publik.