Policia e Kosovës ka njoftuar mbrëmjen e kësaj të shtune se patrullat e tyre në veri të vendit janë sulmuar me armë zjarri. Persona nga grupe të caktuara kriminale të cilat kanë kryer bllokimin e disa rrugëve në veri të vendit, kanë shtënë tre herë në drejtim të njësive policore. Policët kanë qenë në detyrë në afërsi të liqenit të Ujmanit, në drejtim të Pikës Kufitare të Bërnjakut. Policia e Kosovës ka bërë me dije se në vetëmbrojtje janë detyruar t’i kundërpërgjigjen grupeve që i cilësojnë kriminale dhe këta të fundit janë zmbrapsur dhe janë larguar në drejtim të panjohur. Ende nuk dihet nëse nga të shtënat ka persona të lënduar apo dëme të mundshme të shkaktuara. Pak më parë këtë të shtunë presidenti serb, Vuçiçe ka paralajmëruar se autoritetet serbe do të bëjnë kërkesë te misioni i NATO-s në Kosovë, KFOR, që të kthejnë ushtrinë dhe policinë serbe në territorin e Kosovës.