Autoritetet franceze takohen sot për të vendosur mbi ashpërsimin e masave për të luftuar virusin. Rastet e konfirmuara në Francë shkuan në afro 10 mijë 24 orët e kaluara, shifra më e lartë ditore kjo që nga fillimi i pandemisë. utoritetet shëndetësore kanë raportuar për 9,843 raste të reja të konfirmuara me sëmundjen COVID-19, që shkakton ky virus, duke tejkaluar rekordin e një dite më parë, për gati 900 më shumë persona të infektuar. Të dhënat janë publikuar në prag të takimeve kyçe të ministrave dhe ekspertëve shëndetësorë rreth ashpërsimit të masave, me qëllim të luftimit të virusit. Franca gjendet e shtata në listë sa i përket numrit të të vdekurve me koronavirus në nivel botëror. Më shumë se 30,800 persona kanë vdekur në këtë shtet për shkak të sëmundjes COVID-19. Numri i personave në kujdes intensiv është rritur ditëve të fundit në Francë. Ndonëse spitalet ende janë larg shifrave të muajit prill sa i përket të shtruarve në spital, ekzistojnë shqetësime për vështirësitë që mund t’i sjellë sistemit shëndetësor rritja e numrit të personave të sëmurë.