Shërbimi rus i emergjencave tha se një helikopter i tij është rrëzuar në liqenin Onega, në rajonin veriperëndimor të Karelias, duke vrarë tre pjesëtarët e ekuipazhit që ndodheshin në bord. Komunikimi me helikopterin Mi-8, i cili ishte në një mision stërvitor, humbi papritur të dielën, tha shërbimi.Autoritetet nënvizuan se shkaku i rrëzimit të helikopterit nuk dihet, ndërsa shtuan se tashmë ka nisur një hetim për të zbardhur ngjarjen. Mbetjet e helikopterit u gjetën rreth 11 kilometra larg nga bregu i liqenit Onega, që është edhe liqeni i dytë më i madh në Evropë, në një thellësi prej 50 metrash, tha Ministria e Emergjencave në një deklaratë të hënën. Autoritetet njoftuan se janë angazhuar më shumë se 140 specialistë dhe 33 pajisje, si dhe zhytës nga Qendra për Operacione Shpëtimi me Rrezik të Veçantë e Ministrisë së Emergjencave. Zhytjet do të zhvillohen në një thellësi maksimale prej 60 metrash, ndërsa nën ujë do të veprojnë edhe mjetet nënujore me telekomandë, që mund të shkojnë deri në 300 metra thellësi.