Top News/ Rrëzohet helikopteri në mes të qytetit / Tre viktima në aksident, nuk u rrezikuan banorët

Tre persona humbën jetën pasi një helikopter u rrëzua të dielën në jug të qytetit të Meksikos, njoftuan autoritetet lokale në kryeqytet. “Për momentin konfirmohet se tre persona kanë humbur jetën”, tha Sekretari lokal i Sigurisë Publike, Pablo Vázquez në rrjetin social X. Zyrtari shtoi se aksidenti ndodhi në rrethin e Coyoacán-it dhe se as popullata dhe as shtëpitë përreth zonës së rrëzimit të helikopterit nuk janë në rrezik. Më herët, kryebashkiaku i kryeqytetit, Martí Batres, tha se helikopteri u rrëzua në një kryqëzim mes rrugëve Aztecas dhe del Imán dhe se shërbimet e urgjencës shkuan menjëherë në vendngjarje. Nga ana e saj, prokuroria vendase tha se kishte nisur një hetim për rrëzimin e helikopterit. Prokuroria shtoi se stafi i saj ndodhej në vendngjarje dhe se do të jepeshin më shumë detaje në vijim. Sipas gazetës meksikane Reforma, helikopteri ra në tokë, pranë një parku ku qëndronin autobusë të transportit publik dhe mjete mallrash.