Një avion luftarak turk F-16 u rrëzua në provincën perëndimore të Balıkesir të mërkurën në mëngjes, duke vrarë pilotin, tha Ministria turke e Mbrojtjes. Kontakti radio u humb me avionin, i cili u ngrit nga Komanda e Bazës së 9-të të Avionëve Reaktivë në Balıkesir në orën 12:56 minuta të mëngjesit sipas orës lokale, tha ministria në një deklaratë. Operacionet e kërkim-shpëtimit filluan menjëherë dhe më pas u gjetën mbetjet e avionit, shtoi ajo. Mbetjet e avionit u gjetën pranë autostradës Stamboll-Izmir ndërsa piloti i vrarë u identifikua si Majori i Forcave Ajrore, İbrahim Bolat. Mbetjet nga aksidenti u shpërndanë në një zonë të gjerë pranë autostradës, sipas raportimeve të mediave turke. Forcat e sigurisë, zjarrfikësit dhe ekipet mjekësore u dërguan në vendngjarje. Autostrada Stamboll-Izmir u mbyll përkohësisht. "Piloti ynë humbi jetën. Shkaku i aksidentit do të përcaktohet pas një hetimi të nisur tashmë nga ekipi i ekzaminimit në terren", tha ministria, duke shprehur ngushëllimet për familjen e pilotit. Guvernatori i provincës Balıkesir, Ismail Ustaoglu, gjithashtu shprehu ngushëllimet e tij. Ministri i Drejtësisë Akin Gurlek tha se Zyra e Prokurorit Publik në Balıkesir ka nisur një hetim zyrtar për rrëzimin. Gurlek tha se kryeprokurori publik, zëvendëskryeprokurori dhe dy prokurorë të tjerë kanë mbërritur në vendin e aksidentit. Turqia pezulloi fluturimet e avionëve të saj ushtarakë të transportit C-130 në nëntor pasi një prej tyre u rrëzua në Gjeorgjinë fqinje ndërsa kthehej nga Azerbajxhani, duke vrarë të 20 personat që ndodheshin në bord.