Pas rrëzimit të Bashar al-Asad, Turqia nuk ka humbur kohë për të vendosur kontakte zyrtare me kreun e rrebelëve, që tashmë ka marrë pushtetin në Siri, Ahmed Al-Sharaa, I njohur ndryshe edhe si Abu Muhammed al-Golani. Ka qenë ministri I Jashtëm turk, Hakan Fidan, I cili ka zhvilluar një vizitë zyrtare në Damask të Sirisë, ku është pritur nga Al-Golani. Lajmi është bërë publik nga vetë Ministria e Jashtme e Turqisë, pa dhënë detaje të tjera nga ky takim. Fotografitë dhe pamjet e shpërndara nga ministria tregojnë Fidanin dhe Sharaan, udhëheqësi i grupit islamik Hayat Tahrir al-Sham që drejtoi operacionin për rrëzimin e Bashar Assadit dy javë më parë, të pasuar nga një delegacion i gjerë dhe më pas duke pozuar për fotografi. Të dy ata shihen gjithashtu duke shtrënguar duart, duke u përqafuar dhe duke buzëqeshur. Ky takim vjen dy ditë pasi presidenti turk Rexhep Tajip Erdogan tha se vendi I tij do të ndihmojë administratën e re të Sirisë të formojë një strukturë shtetërore dhe të hartojë një kushtetutë të re, duke shtuar se zoti Fidan do të shkonte në Damask për të diskutuar këtë strukturë të re, por pa dhënë një datë. Ibrahim Kalin, kreu i agjencisë turke të zbulimit MIT, vizitoi gjithashtu Damaskun më 12 dhjetor, katër ditë pas rënies së Assadit. Ankaraja kishte mbështetur për vite me radhë rebelët që përpiqeshin të rrëzonin Assadin dhe përshëndeti fundin e sundimit brutal pesë dekadash të familjes së tij pas një lufte civile 13-vjeçare.