Udhëheqësi suprem i Iranit, Ajatollahu Ali Khamenei, tha se rrëzimi i presidentit sirian, Bashar al-Assad, ishte rezultat i një plani të Shteteve të Bashkuara dhe Izraelit. Ai shtoi se një nga fqinjët e Sirisë kishte patur gjithashtu rol, por nuk e përmendi me emër. Mesa duket, Khamenei iu referua Turqisë, e cila ka mbështetur rebelët kundër Assadit. “Ajo që ndodhi në Siri, ishte planifikuar kryesisht në dhomat e komandës së Amerikës dhe Izraelit. Ne kemi prova për këtë. Një qeveri fqinje e Sirisë ishte gjithashtu e përfshirë. Ajo kishte rol të qartë dhe vazhdon ta ketë”, tha Khamenei gjatë një fjalimi që u transmetua nga media shtetërore iraniane. Regjimi i Assadit në Siri ra pak ditë më parë, kur pushtetin e mori organizata Hayat Tahrir al-Sham (HTS), e shpallur terroriste nga SHBA-ja. Përmbysja e Assadit shihet si një goditje e rëndë ndaj aleancës politike dhe ushtarake të “Boshtit të rezistencës”, të udhëhequr nga Irani. Kjo aleancë kundërshton ndikimin e Izraelit dhe të SHBA-së në Lindjen e Mesme. Irani shpenzoi miliarda dollarë për ta mbështetur Assadin gjatë luftës civile në Siri, që ka shpërthyer në vitin 2011, dhe ka dislokuar Gardën e tij Revolucionare në këtë vend për ta mbajtur aleatin e tij në pushtet. Disa orë pas rënies së Assadit, Irani tha se pret që marrëdhëniet me Damaskun të vazhdojnë dhe bëri thirrje për krijimin e një qeverie gjithëpërfshirëse që përfaqëson të gjitha segmentet e shoqërisë siriane. Në anën tjetër, presidenti i Shteteve të Bashkuara, Joe Biden, tha se do të angazhohet me të gjitha grupet siriane “për të krijuar një rrugë tranzicioni nga regjimi i Assadit drejt një Sirie të pavarur dhe sovrane”.