Policia e Kosovës tha se ka arrestuar edhe një person i cili dyshohet të jetë i lidhur me sulmin ndaj kanalit të ujit të Ibër-Lepencit në Zubin Potok. Personi i dyshuar, u arrestua mbrëmjen e të dielës, “nën dyshimin që mund të ketë pasur rol të rëndësishëm në kuadër të grupit përgjegjës për rastin e sulmit terrorist ndaj infrastrukturës kritike”, u tha në njoftim. Autoritetet gjyqësore kanë caktuar masën e ndalimit prej 48 orësh për të arrestuarin. Policia tha se gjatë kontrollit në shtëpinë e tij janë sekuestruar edhe armë dhe pajisje ushtarake, përfshirë katër granata dore, një pushkë gjuetie, 500 copë municione të kalibrave të ndryshëm, karikatorë të ndryshëm, radio, dylbi, një kamera, uniforma ushtarake dhe dokumente të ndryshme. “Situata e sigurisë në veri të vendit aktualisht vlerësohet e qetë, por siç e kemi bërë të ditur në vazhdimësi është një situatë e brishtë, e shoqëruar me raste të natyrave të ndryshme kriminale, si ai i sulmit kriminal terrorist mbi infrastrukturën kritike, dhe për këtë arsye vazhdojnë masat shtesë të Policisë së Kosovës”, u tha në njoftimin e kësaj të fundit. Paraprakisht, autoritetet kishin njoftuar për arrestimin e tetë të dyshuarve lidhur me sulmin në fshatin Varrangë të Zubin Potokut. Gjykata Themelore në Prishtinë ka bërë të ditur të dielën se për një të pandehur ka caktuar masën e paraburgimit prej 1 muaji nën dyshimet se ka kryer veprën penale, rrezikimi i rendit kushtetues me shkatërrimin apo dëmtimin e instalimeve dhe pajisjeve publike. Autoritetet e Kosovës e kanë cilësuar sulmin ndaj infrastrukturës kritike si terrorist dhe kanë fajësuar Serbinë. Beogradi, ndërkaq, ka mohuar se është përfshirë në këtë sulm dhe ka thënë se po kryen hetimet e veta për këtë rast. Sulmi në Zubin Potok është dënuar ashpër nga faktori ndërkombëtar. Po ashtu, para se të ndodhte sulmi në Zubin Potok, kishte pasur edhe dy incidente me mjete shpërthyese në veri, një në afërsi të Komunës së Zveçanit dhe një sulm me granata dore në stacionin policor në këtë komunë.