Platformat kineze të tregtisë online, Temu dhe Shein rezultojnë të kenë shitur produkte me përmbajtje të rrezikshme për shëndetin e qytetarëve. Michael McGrath, komisioneri i drejtësisë i Bashkimit Evropian, shprehu vendosmërinë e tij për të marrë masa të ashpra kundër shitjes së këtyre mallrave që nuk përputhen me rregulloret e unionit europian. Në një raport të Parlamentit Europian, nënvizohen disa mallra të konsideruara të rrezikshme duke filluar nga mushamatë për fëmijë me kimikate toksike, size dielli pa filter për rrezet ultraviolet, e deri tek produktet kozmetike që përmbanin butilfenil metilpropional, i cili është i listuar si një kimikat me rrezik të lartë nga BE-ja dhe është ndaluar që nga viti 2022 për shkak të shqetësimeve se ndikon në fertilitet dhe zhvillim të fetusit. Vitin e kaluar, qeveria e Mbretërisë së Bashkuar u tha konsumatorëve të hidhnin çdo produkt që përmbante këtë përbërës. “Jam i shokuar nga kjo dhe mendoj se kemi detyrë të mbrojmë konsumatorët evropianë”, tha McGrath për Guardian duke shtuar se këto platforma po dëmtojnë bizneset lokale përmes konkurrencës së padrejtë. “Rritja është e jashtëzakonshme dhe ka ushtruar presion të madh mbi shtetet anëtare”, tha ai. Shifrat e BE-së tregojnë se 12 milionë artikuj me çmim të ulët hyjnë çdo ditë, duke arritur në 4.6 miliardë dërgesa nën 150 euro për vitin 2024