Qyteti më i populluar i Australisë, Sidnei, u përfshi nga një shpërthim i nxehtësisë përvëluese të pranverës të shtunën, duke rritur rrezikun e zjarreve në shkurrnaja dhe duke i shtyrë autoritetet të lëshojnë një urdhër për ndalimin e ndezjes së zjarreve. Vapa vjen ndërsa një model i fuqishëm moti El Niño në Paqësor, që pritet të jetë ndër më të fuqishmit në dekada, nxit kushte më të nxehta dhe më të thata në të gjithë Australinë jugore gjatë sezonit të pranverës shtator-nëntor. Të shtunën, parashikuesi i motit në vend tha se temperaturat në kryeqytetin e Uellsit të Ri Jugor, shtëpi e 5.6 milionë njerëzve, do të arrinin 33 gradë Celsius, gati 13 gradë mbi mesataren. Në Aeroportin e Sidneit, temperatura ishte tashmë 28.6 gradë në orën 11:30 të paradites sipas orës lokale, më shumë se shtatë gradë mbi temperaturën mesatare maksimale të shtatorit, sipas të dhënave të parashikuesve të motit. Autoritetet shtetërore të zjarrfikësve lëshuan një urdhër për ndalimin e plotë të zjarrit për Sidnein, ku e vlerësuan rrezikun nga zjarri si "ekstrem", vlerësimi i dytë më i lartë i rrezikut. Ndryshimi i klimës po bën që nxehtësia ekstreme dhe moti me zjarre të bëhen më të zakonshme në Australi, një vend i prirur për zjarret në shkurrnja me rreth 27 milionë banorë. Në janar, mijëra zjarrfikës luftuan zjarret në juglindje të vendit që shkatërruan shtëpitë, ndërprenë energjinë elektrike për mijëra shtëpi dhe dogjën sipërfaqe të mëdha toke.