Izraeli ka qëlluar shtëpi e ndërtesa banimi, përfshirë edhe shkollat gjatë bombardimeve në Rripin e Gazës, duke vrarë civilë, tha të martën komisioneri i Lartë i Kombeve të Bashkuara për të Drejta të Njeriut, Volker Turk. Ushtria izraelite ka vazhduar të martën bombardimet vdekjeprurëse ndaj Rripit të Gazës së kontrolluar nga Hamasi, pasi grupi militant kërcënoi se do të vriste disa prej rreth 150 pengjeve që rrëmbeu në fundjavë, nëse sulmet ajrore do të vazhdonin pa paralajmërim. “Ligji ndërkombëtar është i qartë: kujdesi i vazhdueshëm është detyrim për të kursyer popullatën civile dhe shënjestrat civile gjatë sulmeve”, tha Turk në një komunikatë. Të Hënën, Izraeli njoftoi rrethimin e plotë të Rripit të Gazës, duke mos lejuar futjen e ushqimit dhe ujit, si dhe duke e ndërprerë furnizimin me rrymë. Në lidhje me këtë masë, Turk tha se rrethimet që rrezikojnë jetën e civilëve janë të ndaluara me ligj ndërkombëtar.