Në një samit urgjent të udhëheqësve të BE-së në Bruksel, gurët e themelit të një perandorie të supozuar duket se u vendosën. Kërcënimet e Donald Trump mbi Grenlandën kanë ekspozuar dobësinë e Evropës. Vladimir Putin i Rusisë po bën luftë në krahun e saj lindor. Xi Jinping i Kinës është një konkurrent i pamëshirshëm. Në një epokë të re brutale të fuqive botërore, BE dëshiron të ndërtojë një "super Evropë" më të madhe, më të pasur dhe më të fortë, të aftë t'i rezistojë tekave të rrezikshme të autokratëve të globit. Shndërrimi i bllokut me 27 anëtarë, të vegjël e të mesëm, dhe grindavecë, në një peshë të rëndë gjeopolitike u kërkua nga Emmanuel Macron që në mandatin e parë të Trumpit. Megjithatë, këtë herë është ndryshe. Përgjigja e BE-së për çdo krizë të madhe ka qenë gjithmonë “më shumë Evropë”. Për të pohuar “sovranitetin evropian”, blloku ka nevojë për më shumë anëtarë, më shumë para dhe më shumë ushtri. "Njerëzit duan të bashkohen me BE-në. Askush nuk do të bashkohet me Kinën. Asnjë fqinj i Shteteve të Bashkuara nuk dëshiron të bashkohet me to", tha Bart De Ëever, kryeministri belg, në Davos. Zgjerimi, ishte një fjalë e papëlqyer në Bruksel për vite me radhë. Tani jo më pak se nëntë vende po trokasin në derën e klubit. Lufta në Ukrainë duket se ka ndryshuar shumëçka. Anëtarësimi i Kievit në BE është në lëvizje. Por anëtarësimi është proces i gjatë, i vështirë dhe teknik. Mund të zgjasë më shumë se një dekadë. Në rastin e Ukainës kërkohet që procesi të përshpejtohet. Por shmangia e rregullave për ukrainën do të shtynte ballkanin perëndimor të kërkonte trajtim të ngjashëm. Gjashtë vendet e Ballkanit Perëndimor e kanë lakmuar prej kohësh anëtarësimin. Mali i Zi dhe Shqipëria janë më afër marrjes së çelësave të klubit. Maqedonia e Veriut, Kosova, Bosnje-Hercegovina dhe Serbia janë gjithashtu në listën e pritjes. Moldavia dhe Gjeorgjia aplikuan për t'u bashkuar në 2022. Islanda mund të mbajë një referendum që në pranverë nëse do të bëhet anëtare. Përfshirja e Ballkanit në BE do të forcojë krahun lindor të bllokut. Me Ballkanin, Moldavinë, Gjeorgjinë, Ukrainën dhe Islandën, BE-ja do të rritej me pothuajse 650 mijë km katrore. Popullsia mund të rritet me 57 milionë. “BE-ja do të përfitojë sepse në këtë botë të re madhësia ka rëndësi. Do ta bëjë tregun tonë të vetëm më të madh, do të sjellë stabilitet dhe siguri”, tha zyrtari i BE-së. Por që kjo të funksionojë, duhet të lindë një Evropë e re me shumë shpejtësi.