Një murale që paralajmëron SHBA-në të mos nisë një sulm ushtarak ndaj Iranit është parë në një shesh në qendër të Teheranit. Imazhi paraqet avionë luftarakë të dëmtuar në kuvertën e një aeroplanmbajtëseje me sloganin: "Nëse mbillni erën, do të korrni vorbullën", në persisht dhe anglisht. Muralja në sheshin qendror të teheranit vjen pasi një zyrtar i lartë iranian tha se çdo sulm do të trajtohet "si një luftë e përgjithshme kundër iranit" përpara mbërritjes së një aeroplanmbajtëseje amerikane dhe anijeve të tjera luftarake në rajon. Sheshi përdoret për tubime të organizuara nga shteti dhe autoritetet e ndryshojnë muralen e tij sipas rastit. Donald Trump ka thënë se asetet po zhvendosen "për çdo rast" nëse ai vendos të ndërmarrë veprime. "Ne kemi një flotë masive që shkon në atë drejtim dhe ndoshta nuk do të na duhet ta përdorim atë", tha presidenti amerikan të enjten. Më parë ai u bëri thirrje protestuesve iranianë, mijëra prej të cilëve janë vrarë dhe dhjetëra mijëra të tjerë janë arrestuar nga forcat e regjimit, që të vazhdojnë protestat dhe premtoi se "ndihma është rrugës". Nuk ka pasur protesta në Iran prej disa ditësh dhe Trump pretendoi së fundmi se Teherani kishte ndaluar ekzekutimet e rreth 800 protestuesve të arrestuar, një pretendim që prokurori i lartë i Iranit e quajti "plotësisht të rremë". Por udhëheqësi amerikan ka lënë të kuptohet se po i mban opsionet e hapura, duke thënë se çdo veprim ushtarak do t'i bënte sulmet e SHBA-së në vendet bërthamore iraniane të qershorit të kaluar "të dukeshin thjeshtë si një kilikosje". Ushtria amerikane ka dërguar periodikisht forca shtesë në Lindjen e Mesme në kohë tensioni të lartë, në lëvizje që shpesh janë parë si mbrojtëse. Por një grumbullim i madh i forcave vitin e kaluar ndodhi përpara nisjes së sulmeve ajrore kundër programit bërthamor të Iranit.