Prokuria e Posaçme kërkoi burgim të përjetshëm për Altin Hajrin, i akuzuar si organizatori i rrëmbimit dhe vrasjes së Jan Prengës, por që po gjykohet në mungesë pasi është në arrati. SPAK dha këtë të enjte pretencën, ndërsa vendimmarrja e gjykatës u shty pas kërkesës së avokatit të Hajrit për kohë që të njihet me konkluzionet e prokurorisë. Jan Prenga u rrëmbye më 17 janar 2020 në Kamëz, si pjesë e një konflikti kriminal për 260 kg kokainë të humbur në Angli, ku dyshohet se ishte përfshirë vëllai i tij. Ai u dërgua në “Golden Resort” në Shijak, ku mendohet se u vra dhe trupi i tij më pas u zhduk. Sipas hetimeve, Altin Hajri është një nga figurat kyçe të dyshuara për organizimin e rrëmbimit dhe zhdukjes së Prengës, ndërsa pamjet e sigurisë dhe komunikimet në aplikacione të enkriptuara janë pjesë e provave kyçe të prokurorisë.