Shtetet e Bashkuara nuk kanë gjasa të shërbejnë si një ndërmjetës efektiv në konfliktet ndërkombëtare, duke pasur parasysh veprimet e tyre në skenën globale, tha të enjten zyrtari i lartë i sigurisë ruse Dmitry Medvedev. Komentet e Medvedev, ish-president i Rusisë, duket se bien ndesh me linjën zyrtare të Kremlinit se SHBA-të po luajnë një rol të vyer në kërkimin e një zgjidhjeje paqeje mes Rusisë dhe Ukrainës. "Është e vështirë të mendosh se një vend që rrëmben presidentë dhe fillon konflikte në këtë mënyrë mund të veprojë si një ndërmjetës efektiv në të gjitha situatat", tha Medvedev të enjten. Ai dukej se po i referohej luftës në Iran dhe operacionit të forcave speciale amerikane për kapjen e Presidentit të Venezuelës Nicolas Maduro. Megjithatë, Medvedev pranoi se administrata e Trump po bënte një përpjekje për të zgjidhur konfliktin e Ukrainës, në kontrast sipas tij me presidentin e mëparshëm, Joe Biden. Medvedev, nënkryetar i Këshillit të Sigurisë së Rusisë, është një nga zyrtarët më agresivë të vendit dhe shpesh bën komente të ashpra mbi çështjet globale. Ai tha po ashtu të enjten, se Evropa po kalonte një proces militarizimi që e krahasoi me përgatitjet për Luftën e Dytë Botërore. Medvedev tha gjithashtu se 450,000 njerëz kishin nënshkruar kontrata për t'u bashkuar me forcat e armatosura ruse në vitin 2025, dhe 127,000 të tjerë deri më tani këtë vit. Pas një mobilizimi të detyrueshëm jopopullor në vitin 2022, Moska tani mbështetet në rekrutimin e ushtarëve profesionistë për të zhvilluar luftën në Ukrainë, tani në vitin e saj të pestë, dhe u ofron atyre pagesa bujare për regjistrimin.