Socialistët dhe demokratët patën dakordësi të plotë për rregulloren e re të Kuvendit. Në frymën edhe të traditës parlamentare, të majtë e të djathtë votuan unanimisht ndryshimet e rregullave të lojës në Këshillin për Mandatet, Rregulloren dhe Imunitetin. U pranuan propozimet e opozitës për sekretariatin e etikës. Që ky organ të mos kthehej në mekanizëm arbitrariteti në duart e shumicës parlamentare, të djathtët propozuan që të ketë në përbërje një sekretar dhe pesë anëtare në raporte të barabarta mes shumicës dhe pakicës. Kur votat në këtë Sekretariat ndahen në mënyrë të barabartë, vota e Sekretarit është përcaktuese. Vendimet e sekretariatit për përjashtim nga punimet parlamentare të deputetëve që kanë kryer shkelje të rregullores, do të përllogariten me ditë kalendarike dhe do shoqërohen me sanksion financiare të ndalimit të pagës së deputetit për aq ditë sa është marrë masa disiplinore. Në rast se masa ankimohet në Byronë e Kuvendit, efektet e saj pezullohen deri kur të marrë vendim byroja. Partia Socialiste u tërhoq nga përgjysmimi i kohës së diskutimit në seancë plenare dhe nga kalimi me procedurë të përshpejtuar të projektligjeve që vijnë për përafrimin me legjislacionin e Bashkimit Europian.