Çështja e patronazhistëve të Partisë Socialiste ka qenë në fokus të opinionit publik por edhe të replikave të shumta ndërmjet krerve të partive politike në vend. Për të shpjeguar më shumë sesi funksionon dhe se si arrin t’i mbledhë të dhënat një patronazhist ka qenë i ftuar sot në emisionin “Breaking” në Top News, një prej tyre , i cili vendosi të ruante anonimitetin. Sipas tij, roli i patronazhistit në Partinë Socialiste është kryerja e sondazheve politike në lidhje me zgjedhjet parlamentare. Puna zhvillohet duke trokitur derë më derë ose duke kontaktuar në telefon me qytetarët të cilët me vullnetin e tyre të plotë, zgjedhin të japin apo jo informacion për patronazhostët. I ftuari i “Breaking” specifikon se asnjë informacion nuk është vjedhur dhe çdo detaj i databazës së publikuar është dhënë me dëshirën e plotë të qytetarëve. Sipas tij çdo parti politike në vend ka zyrat e veta në çdo zonë, në çdo njësi administrative. Aty mblidhen organizatat partiake, ku mblidhen edhe patronazhistët, detyra e të cilëve është të mbajnë shënim përgjigjet që u japin vetë qytetarët. E njëjta gjë ka ndodhur dhe me informacionet konfidenciale që u zbuluan në databazën e publikuar pak ditë më parë. Sipas patronazhistit edhe numri i kartës së identitetit dhe numri i telefonit jepen nga vetë qytetarët. Më pas kur vjen dita e zgjedhjeve shikohet nëse sondazhi i kryer nga patronazhistët ka qenë i saktë apo jo. Kjo punë është totalisht vullnetare dhe çdo qytetar që dëshiron të japë kontributin e vet në një parti politike mund të bëhet patronazhist, pa marrë asgjë në këmbim.