Hezbollahu sulmoi me raketa qytetin e tretë më të madh të Izraelit, Haifa, tha policia izraelite të hënën. Ndërkohë, mediat izraelite raportuan se 10 persona u plagosën në veri të vendit nga sulmet në përvjetorin e parë të luftës në Rripin e Gazës, luftë që tani është përhapur në Lindjen e Mesme. Hezbollahu, një aleati Hamasit, tha se sulmoi një bazë ushtarake në jug të Haifës me një breshëri raketash “Fadi 1”. Mediat izraelite thanë se dy raketa ranë në bregdetin mesdhetar të Haifës, ndërsa pesë të tjera goditën Tiberiasin, rreth 65 kilometra larg. Policia tha se disa ndërtesa dhe prona janë dëmtuar dhe se u raportua për disa të plagosur lehtë. Ushtria izraelite në anën tjetër bëri të ditur se avionët e saj luftarakë goditën objektiva që i përkisnin Selisë së Inteligjencës së Hezbollahut në Bejrut, dhe shkatërroi mjete për grumbullimin e informacioneve, qendra komanduese dhe infrastruktura të tjera. Ushtria izraelite tha se në orët e fundit kishte bombarduar depot e armëve të Hezbollahut në zonën e Bejrutit. Sulmet ajrore goditën gjithashtu objektiva të Hezbollahut në Libanin e Jugut dhe zonën e Bekës, tha ushtria. Izraeli e fajëson Hezbollahun se qëllimisht i ka vendosur qendrat e komandës dhe ka fshehur armatimin nën ndërtesat e banimit në zemër të Bejrutit, duke rrezikuar popullsinë civile. Të hënën, izraelitët shënuan përvjetorin e parë të sulmit vdekjeprurës që Hamasi e kreu në jug të Izraelit. Ai sulm shkaktoi një luftë e cila ka nxitur protesta në mbarë botën dhe rrezikon të ndezë një konflikt më të gjerë në Lindjen e Mesme. Forcat e sigurisë janë në gatishmëri të lartë në gjithë Izraelin të hënën, thanë ushtria dhe policia, duke parashikuar sulme të mundshme palestineze të planifikuara për përvjetorin e parë të 7 tetorit, kur edhe filloi përgjakja më e rëndë në konfliktin që zgjat prej dekadash izraelito-palestinez.