Ministria ruse e mbrojtjes tha të dielën se mbrojtja e saj ajrore rrëzoi 125 dronë ukrainas gjatë natës, ndërsa një apartament banimi u godit në qytetin perëndimor të Voronezhit, sipas guvernatorit lokal. Në anën tjetër, guvernatori i rajonit perëndimor të Belgorodit, Vyacheslav Gladkov, në një raport mbi sulmet me dronë dhe bombardimet e 24 orëve të fundit, tha se një burrë kishte humbur jetën në qytetin kufitar Shebekino, ndërsa tetë civilë u plagosën në rajonin e Belgorodit. Ndërsa Rusia përparon në Ukrainën lindore, Kievi e ka çuar konfliktin në Rusi, me një sulm ndërkufitar në rajonin perëndimor të Kurskut në Rusi që nisi më 6 gusht dhe duke kryer sulme gjithnjë e më të mëdha me dronë thellë në territorin rus. Ministria ruse e Mbrojtjes tha se fokusi i sulmeve të fundit ishte rajoni jugor i Volgogradit, mbi të cilin u rrëzuan 67 dronë. Ministria tha gjithashtu se 17 dronë u pikasën mbi secilin nga rajonet Belgorod dhe Voronezh dhe 18 u rrëzuan mbi rajonin e Rostovit. Alexander Gusev, guvernatori i rajonit Voronezh, tha në aplikacionin e mesazheve Telegram se një dron i rrëzuar goditi një kompleks banimi, duke shkaktuar një zjarr. Sipas informacioneve paraprake, zjarri është vënë nën kontroll dhe nuk ka persona të lënduar. Kanali Mash Telegram postoi ndërkohë një video që pretendonte se tregonte zjarrin që përfshiu katin e fundit të një ndërtese të lartë banimi në Voronezh. Në përditësimin e saj, ukraina raportoi një sulm rus mbi një spital në rajonin e Sumit, në pjesën verilindore të vendit, që sipas saj vrau 10 persona dhe plagosi të paktën 22 të tjerë. Këshilli i Qytetit tha në faqen e tij të internetit se nëntë ndërtesa të tjera, të larta u dëmtuan përveç spitalit. Prokurorët ukrainas thanë se në kohën e sulmeve 86 pacientë dhe 38 pjestarë të stafit ndodheshin në spital.