I arrestuari këtë të premte në Vlorë është Ferdinand Llanaj, ose i njohur ndryshe me pseudonimin “robi”. Në territorin e banesës dhe përreth territorit të banesës së Ferdinant Llanaj u gjetën rreth 600 bimë kanabis sativa të kultivuara dhe një sasi e vogël boçesh. Por kjo nuk është hera e parë që emri i Llanajt ndeshet nga policia e shtetit pasi me 1 tetor të vitit 2017, në rrugën transballkanike,ai u qëllua me breshëri plumbash, teksa po udhëtonte me makinë së bashku me mikun e tij, Dritan Begaj dhe një të mitur. Ai i shpëtoi atentatit, duke mbetur i plagosur. Por këto konflikte të tij e kanë zanafillën plot 23 vite më parë kur në vitin 1998 familjet Llanaj dhe Petraj u përgjakën pasi u përfshinë në një konflikt për motive të dobëta, e ku mbeti i vrarë kunati i Baftjar Llanajt, e pak më vonë u plagos edhe një anëtar i fisit Petraj. Pesë vite më vonë, në vitin 2003, u vra edhe një nga vëllezërit e fisit Petraj. Hakmarrjet e nisura do të vijonin në qershor të vitit 2011, kur në vendin e quajtur “Bishti i Malit” u ekzekutua me armë automatike 62-vjeçari Baftjar Llanaj. Për këtë ngjarje u arrestuan Ardian Azizi dhe Fatmir Petraj. Pas kësaj ngjarjeje, fisi i Llanajve filloi të forcohej duke krijuar bandën e tyre, e filluan të lëviznin me mjete të blinduara dhe të shoqëruar nga persona të armatosur. Kalvari i hakmarrjeve do të shënonte ngjarjen e radhës të përgjakshme, në prillit të vitit 2019 në lagjen “Çole” të Vlorës, ku u ekzekutuan 3 të rinj brenda një lokali. Për këtë krim u dënua me 35 vite burg Aleksandër Llanaj, vëllai i Ferdinand Llanajt. Babi i tyre, Baftjar Llanaj, mbeti i vrarë në një atentat të vitit 2011.