Prodhimi i Brendshëm Bruto i ekonomisë shqiptare ka tejkalur nivelet e parapandemisë, por rritja e mëtejshme do të ngadalësohet prej një sërë faktorësh. ‘The Economist’ i ndan risqet në përditësimin e parashikimeve për këtë vit Shqipërinë në dy grupime, të brendshme dhe të jashtme. Te risqet e brendshme rendit qeverisjen e dobët, nivelin e lartë të korrupsionit, ngadalësimin e reformave, emigracioni dhe pasigurinë e situatës politike, që sipas medias britanike kanë shtuar rrezikun e trazirave sociale. Risqet e jashtme renditen lufta në Ukrainë, që në terma makro do të vijojë të mbajë në nivele të larta inflacionin, çrregullimi i zinxhirëve të furnizimit dhe varësia e lartë nga monedhat e huaja, që zbeh politikat monetare të Bankës së Shqipërisë për zbutjen e inflacionit. Në lidhje me reformat, The Economist kujton zotimin e Qeverisë për të vijuar me reformën në drejtësi dhe reformat e tjera strukturore për ekonominë.