E rrethuar nga fusha të gjelbëruara, Flat House, e cila ndodhet në një fermë në Britaninë e Madhe, duket si një hambar. Por brenda, pamja dhe ndjesia e ndërtesës të bëjnë menjëherë të kuptosh se kjo është diçka krejt ndryshe. “Muret të kujtojnë strofullat e barit që kemi bërë kur ishim fëmijë“, thotë pronarja e Flat House, Gemma Barron. “Ka cilësinë akustike më të mirë. Dhe vitin e kaluar, ne e fikëm ngrohjen për 24 orë në mes të dimrit, por shtëpia sërish qëndroi e ngrohtë.” Ajo që e bën të pazakontë këtë shtëpi të ndritshme, të ajrosur dhe të rehatshme është materiali i përdorur për ndërtimin e saj, kërpi i kanabisit. Kërpi është një burim i rinovueshëm, me veti kapëse të karbonit. Kur përdoret në ndërtim, ai zakonisht merr formën e “hempkretit” (i njohur gjithashtu si betoni i kërpit gëlqeror). Hempkreti ka një masë të lartë termike, duke e bërë atë një material ideal izolues i cili përmirëson efikasitetin energjetik të ndërtesave dhe redukton emetimet e gazeve serrë me kalimin e kohës.