Pasioni i Amina Helmit për Rrugën e Qumështit është i qartë sapo hyn në zyrën e saj në Universitetin e Groningenit, në veri të Holandës. Gërmimi në të shkuarën e Rrugës së Qumështit i ka dhënë kësaj astronomeje 55-vjeçare, me origjinë nga Argjentina, Çmimin Kavli, i njohur gjerësisht si Çmimi Nobel i astrofizikës. Helmi është një eksperte botërore në një fushë të njohur si arkeologjia galaktike, e cila synon të deshifrojë atë që i ka ndodhur galaktikës sonë në të kaluarën dhe të shohë një pamje të së ardhmes së saj duke përdorur yjet si "fosile kozmike". "Ne mund të masim, për shembull, sasinë e kimikateve në yje", thotë Helmi në një intervistë për AFP. "Kjo funksionon si një lloj ADN-je e një ylli në kuptimin që ato ruajnë informacionin se ku kanë lindur dhe në cilin mjedis." Stronomja nuk fiksohet pas një teleskopi por humbet mbi katalogë të dhënash që përmbajnë informacion të çmuar rreth yjeve. Misioni Gaia i Agjencisë Hapësinore Evropiane, i cili synonte të formonte një hartë tre-dimensionale të Rrugës së Qumështit, ishte një pikë kthese kyçe për kërkimin e saj. Të dhënat i lejuan Helmit dhe ekipit të saj të bashkonin ngjarjet që ndryshuan galaktikën tonë përgjithmonë. Rreth 10 miliardë vjet më parë, shumë kohë para se të lindte Dielli ynë dhe yjet që mund të shohim sot, një galaktikë xhuxhe, Gaia-Enceladus, u përplas me atë që në atë kohë ishte Rruga e Qumështit. Dy galaktikat u shkrinë dhe yjet që shohim tani janë pjesë e një aureole që rrethon galaktikën tonë. Yje të rinj u krijuan gjithashtu si pasojë e përplasjes kozmike, duke krijuar një disk të "fryrë" që është një tipar i Rrugës së Qumështit.