Ali Veshti, nga fshati Qinam i Zall-Herrit, ka hyrë në shtëpinë e re, të rindërtuar pas tërmetit të 26 Nëntorit, i cili e la pa strehë familjen e tij. Gjatë një vizite në banesën e re, Kryebashkiaku Erion Veliaj tha se është mundësuar rindërtimi në kohë i shtëpisë, pavarësisht terrenit të vështirë. “Këtu jemi në ekstrem të Tiranës, por si kjo janë ndërtuar mbi 100 e ca shtëpi, në kushte jashtëzakonisht të vështira. Shpesh kanë ardhur brigada nga Tirana, e shpeshherë na është dashur të bëjmë nga një mini kantier në çdo vend. Megjithatë, të gjitha harrohen kur një punë përfundon për bukuri” Kreu i Bashkisë premtoi se pas përfundimit të shtëpive individuale do të nisë edhe lagja e re në Zall-Her, pas të cilës do të ndërtohet e gjithë infrastruktura rrugore. “Po futemi në fazën tjetër, ndërtimin e lagjes pranë njësisë administrative. Më pas do të bëhet edhe rruga e në këtë moment, Qinami do të kthehet në një lagje të Zall Herrit, dhe Zall Herri në një lagje të Tiranës” Bashkia e Tiranës bën të ditur se në Njësinë Administrative Zall-Herr po rindërtohen 161 shtëpi individuale të shpërndara në disa fshatra të njësisë, si dhe 49 banesa në lagjen e re.