Policia ka arrestuar dy vëllezër si autorët e vrasjes të 71 vjeçarit Abdulla Budlla në Fushë Prezë, pranë Rinasit më 3 gusht. Sajmir Shera 32 vjeç dhe Arsel Shera 20 vjeç akuzohen se kanë ekzekutuar me armë taksistin. Policia ka sekuestruar makinën e krimit një automjet të markës Wolkswagen. Policia njofton se vëllai i madh, Saimir Shera është një person me precedent të mëparshëm penal, i dënuar më herët. Aktualisht nuk jepen detaje për arsyet e vrasjes së 71 vjeçarit nga dy vëllezërit, por dyshohet për një konflikt të mëparshëm. Abdulla Budlla u qëllua kur po rrinte pranë makinës së tij të parkuar me 3 gusht, rreth orës 16:45 të pasdites. Budlla me banim në fshatin Ahmetaq të Prezës u gjet në anë të rrugës në Fushë-Prezë, në kryqëzim me rrugën e Rinasit, sipër një fuçie, pak metra larg mjetit të tij "Renault" me të cilin punonte në zonë si taksist, por pa licensë. Ai është qëlluar me 7 plumba, duke e lënë të vdekur në vend, teksa autorët janë kujdesur që të mos lënë asnjë gjurmë duke mbledhur edhe gëzhojat.