Dy qytetarë janë arrestuar në aeroportin e Rinasit, pasi tentuan të korruptonin punonjësit e Policisë Kufitare, me qëllim lejimin për të udhëtuar drejt vendeve të BE-së, edhe pse nuk plotësonin kushtet. Sipas policisë shërbimet Kufitare në Rinas, arrestuan në flagrancë, për veprën penale “Korrupsioni aktiv i personave që ushtrojnë funksione publike”, një 41 vjeçar, banues në Tiranë dhe një 56 vjeçar, banues në Divjakë. Arrestimi i tyre u bë pasi gjatë kontrollit të dokumentacionit dhe intervisitimit për qëllimin e udhëtimit në vendet e BE-së, ofruan para per te kaluar, pasi nuk justifikonin qëllimin e lëvizjes dhe nuk plotësonin kushtet për të udhëtuar në hapsirën Schengen. 41 vjeçari nga Tirana i ka ofruar punonjësit të Policisë Kufitare 50 euro, ndërsa disa orë më vonë 56 vjeçari nga Divjaka, i cili donte të udhëtonte bashkë me bashkëshorten, i ka ofruar punonjësit të Policisë Kufitare 100 euro, me qëllim lejimin e kalimit. Policia Kufitare apelon për të gjithë shtetasit që duan të udhëtojnë drejt vendeve të BE-së, që në rast se nuk plotësojnë kushtet për të lëvizur në hapësirën Schengen të mos ndërrmarin asnjë veprim të kundërligjshëm, pasi do përballen me ligjin.