Për të dytën herë në harkun e pak ditëve kryedemokrati Basha është ndalur tek situata ekonomike në vend, e rrënuar edhe më shumë për shkak të pandemisë nga covid 19. Basha deklaroi se gjendja ku jemi sot është e pakrahasueshme me asnjë vend të rajonit apo të Europës dhe shtoi se vendi po përballet me një katastrofë potenciale, teksa i quajti faje dhe jo gabime ato që nuk janë bërë nga qeveria këta 6 muaj për menaxhimin e pandemisë. “Prej më shumë se 6 muaj Shqipëria po lëngon nga efektet e pandemisë COVID e cila ka nxjerrë zbuluar disa plagë të thella strukturore të ekonomisë dhe shëndetësisë shqiptare. Për fat të keq këto 6 muaj nuk kanë shërbyer për të hartuar dhe vënë në jetë një plan efikas masash për të ndihmuar njerëzit apo të përmirësojë përgjigjen shëndetësore ndaj COVID-it drejtpërdrejt dhe efektin që kjo pandemi ka pasur tek pacientët dhe familjarët e tyre. Të gabosh është njerëzore ndonëse për PD nuk janë gabime, por janë faje ato që nuk janë bërë këto 6 muaj”. Duke iu rikthyer muajit mars, kur virusi i rrezikshëm preku edhe Shqipërinë, ndërsa në Evropë shifrat e të prekurve dhe viktimave ishin të larta, Basha tha se janë paraqitur propozime konkrete nga opozita, por që nuk i zbatuan nga qeveria.